PRIMERA CRÓNICA GENERAL DE ESPAÑA

QUE MANDÓ COMPONER ALFONSO EL SABIO

Y SE CONTINUABA BAJO SANCHO IV EN 1289

EL REGNADO DEL REY DON ALFONSO EL SESTO, QUE REGNO XXVI^o DESPUES DEL REY DON PELAYO, ET LA SU ESTORIA SE COMIENÇA.

Capitulo 856. De como el Çid uencio al rey Fariz et al rey Galbe. [169r]

Pves que Aluar Hannez caualgo; el Çid del et los otros suyos cometiron a los moros muy de rezio. Et por que los moros fincaran mal escarmentados de la otra uez et non se treuien ya lidiar con los xristianos fincaron uençudos. Et los xristianos yendo los ya leuando; uio el Çid al rey feriz do estaua. Et enderenço contra el. firiendo en los que fallaua ante si. Et assi los desbarato a todos et los tiro delant que llego a el. Et diol tres colpes. Et ell uno fue tal quel rompio la loriga et passol al cuerpo. De guisa que corrie la sangre del. Et el rey fariz sintiendo se muy mal daquella ferida boluio la Rienda al cauallo pora foyr. Et yuasse saliendo del campo. Las otras sus compannas quando aquello uieron fazer al rey; començaron ellos a fazer esso mismo. Martin antolinez otrossi llego all otro rey que dizien Galbe. Et diol con la espada por ell yelmo. Et tantol corto del fierro que llego a la carne. Et quisieral luego dar otro colpe si non que gele non quiso esperar Galbe. Et fueron desta guisa arrancados alli los reys moros. Et començaron de foyr ellos et sus compannas et dexaron el campo a los xristianos. Et cogiosse el rey fariz pora Theruel. Et el rey Galbe pora Calathayud. Et el Çid et Aluar Hannez et sus compannas firiendo siempre en ellos. Et matando; fasta en las puertas de la Villa. Et desi tornaron se el Çid et sus compannas al logar do la batalla ouieran. Et entre armas et aueres et otras cosas leuaron ende muy grand algo. Et de los cauallos et de los moros que andauan esparzudos quando los llegaron fallaron .d. Et .x. sin los que yazien muertos en el campo. Et estos .d. Et .x. fueron de los cauallos de los moros. Et de los suyos fallaron .xv. menos. Et cogieron se estonces el Çid et sus compannas con esta bien andança. et con esta ganancia tan grand que alli auien fecha. Et entraron se en aquel su castiello que dizien Alcaçar. Desi mando el Çid que los moros naturales dalli que echaran del Castiello quando salieran a lidiar et estauan y de fuera que los metiessen dentro. pora seruir se dellos como antes. Et aun sobre esto fizo les dar algo delo que alli ganaran de los otros moros. Et fue muy alegre el Çid et todos sus uassallos con ell. Et dio les a partir lo que alli tomaran. Et cayeron a el en el su quinto .c. Et .ij. cauallos. Et fueron todas las compannas muy pagadas por que se partiera todo tan bien. Et dado todo su derecho a cada uno en la su guisa. Empos esto dixo el Çid a Aluar Hannez Minnaya. Aluar Hannez. todo algo que uos omne fiziesse merecedes lo uos muy bien. a guisa de muy buen cauallero. Et quiero que tomedes del mio quinto quanto uos quisieredes. [169v] Et uos sabedes bien como me a ayrado nuestro sennor el rey don Alffonso. Et querermia quanto pudiesse trabaiar de ganar la su gracia. Onde quiero que escoiades .xxx. de los meiores cauallos destos que ami cayeron de los moros. Et que los tomedes ensellados et enfrenados et con sennas espadas a los arçones et que los leuedes. Et los empresentedes assi por mi al rey don Alffonso mio sennor. Et quanto uos mas pudieredes ganat me la su gracia et el su amor. Et otrossi quiero que de oro et de plata leuedes tanto; por que me fagades cantar mill missas en santa maria de Burgos. Et aun que uos finque ende assaz que dedes ende a mi mugier et a mios fijos. Desi diredes a nuestro sennor el rey et a nuestros amigos de como nos ua muy bien loado a Dios. Otrossi diredes a mi mugier et a mis fijas que rueguen a Dios cada dia por nos. et que si les yo uiuo que les fare seer Ricas duennas. Minnaya acogiosse muy de grado a quanto el Çid le mandaua. Et tomo los cauallos et las otras cosas que el Çid dixiera. Et parosse guisado et presto pora entrar en su camino. Et dixol el Çid quando se espidie de yda. Aluar Hannez esta tierra es angosta. Et non podemos en ella fincar. Et nos por armas auemos a guarir. Et de como yo cuedo a yr nos auremos daqui. Et si por uentura de uuestro torno non nos fallaredes en este logar; do quier que sopieredes que somos yd uos pora nos. Agora dexaremos a Aluar Hannez Minnaya complir su mandaderia; et tornaremos a la Razon del Çid. Et contaremos dell en esta guisa.

Capitulo 857. De como el Çid se fue del castiello de Alcocer et poso sobre Mont Real.

Mynnaya tomo estonces los .xxx. cauallos que dixiemos et las otras cosas que auie de leuar. Et fuesse pora Castiella. Et el Çid finco alli con las otras sus compannas. Et los moros daquellos fronteros guardauan et estauan ascuchando. apercebidos cada dia por uer que farie. Et entre tanto sanara ya el rey feriz. Et ouieron su acuerdo los de Theca et los de Theruel. Et los de Calathayud. como acordassen a una todos. Et de como fiziessen si mester les fuesse. El Çid otrossi por que querie salir dalli a yr uuscar mas conseio del que tenien et auie mester auer que diesse a las compannas con que se guisassen; empenno a los moros aquel Castiello de Alcaçar por. tres mill marcos de plata. Et partio los a sus compannas. Et fizo los Ricos a todos. assi a caualleros como a peones. Pero de guisa que acada uno en su derecho. Et començaron ellos mismos a dezir. Qui a buen sennor sirue esse uiue en bien andança. Empos [170r] esto queriendo el Çid quitar el Castiello; los moros que y morauan començaron se a quexar mucho por ello. por que les fazie el Çid mucho bien et mucha merced. Et rogauan a Dios por el quel guiasse en su seruicio. Et que la su bien andança que siempre fuesse adelante pues que yr se querie. Et pues que el Çid ouo quito el Castiello. Et dexado en recabdo; fuesse de Alcaçar su senna tenduda. Et fincaron los moros et las moras todos llorando por ell. Et passo ell el Rio Salon. Et dizen algunos que saliente desse Rio que ouo muy buenas aues et sennales de bien andança. Mucho plogo a los de Theca et de Calathayud por que se yua dalli el Çid Roy Diaz. Mas mucho peso a los de Alcaçar por el grand algo que les el fazie. Et pues que llego el Çid a un poyo que es sobre Mont real. Et aquel logar es tan alto et tan fuerte que se non temie alli el Çid de guerra de ninguna parte. Et daquel lugar fazie el mucho mal a Medina et a Theruel. Et a las otras villas de aderredor. de guisa quel ouieron todos a pechar. Et metio so el su poder a Zelffa la de Canal. Agora dexa aqui la estoria de fablar del Çid; et torna a contar de Aluar Hannez en su mandaderia o fuera.

Capitulo 858. De como fue a Aluar Hannez Minnaya con el rey don Alffonsso.

Qvando Aluar Hannez llego desta uez con su gujsamiento al rey don Alffonso; apresentole luego aquellos .xxx. cauallos que el Çid le enujaua como dixiemos muy bien guisados. El rey don Alffonso quando los uio con sus espadas a los arçones sonrrixosse. Et ante que Aluar Hannez le dixiesse su Razon preguntol el rey et dixol. Minnaya. estos cauallos quien melos enuia. Dixol Mynnaya sennor. Mio Çid Roy Diaz. el campeador. Et pues quel nos ayrastes yl echastes de tierra gano el de moros el Castiello de Alcaçar. Et teniendol ya el; fizieron lo los moros saber al rey de Valencia. Et el rey de Valencia enuio y sus poderes con dos reys moros contra el. Et cercaron le alli. Et tollieron le ell agua. assi que lo non pudiemos ya soffrir. Estonces el Çid touo por bien de salir a ellos et morir ante por buenos lidiando; que por malos yaziendo encerrados. Et salimos et lidiamos con ellos en campo. Et uencio los el Çid. Et fueron y mal feridos amos los reys moros. Et de los otros murieron y muchos. Et furon presos muchos. Et fue muy grand la ganancia que y fiziemos de cauallos et de lo que cogiemos en el campo. Et de los cauallos que cayeron alli al Çid en el su quinto enuia ende auos sennor estos .xxx. con sus espadas. como a sennor natural. Et muj [170v] mesurado. cuya gracia querrie ell auer mas que otra cosa. Et sennor mandome que uos besasse las manos et los pies por ell. Et sennor yo fago lo assi. Et Mynnaya beso le las manos. Desi abaxosse por besarle los pies. Et non quiso el rey. Desi dixo Mynnaya. Sennor. pide uos el Çid merced quel perdonedes et que aya el la uuestra gracia. Dixol estonces el rey. Mynnaya mucho es ayna. de omne ayrado et echado de tierra et sin gracia de sennor; de coger le a tres sedmanas. Ca tal es de como tres sedmanas de quandol yo eche de tierra. Et esto non pertenesce a rey. Ca ningun rey njnsennor non se deue assannar por tan poco. si non sil cumple mucho. Pero al presente uos digo. que por que los cauallos son de ganancia que el fizo de moros; tomo los por ende. Et plaze me mucho por que tal caualgada fizo el Çid. Et por la batalla que uencio. Mas a uos Mynnaya perdono uos yo la salida que fiziestes con el. Et otorgo uos la tierra que teniedes de mi. que la tengades. Et douos la mi gracia que uayades o quisieredes. Et que uengades cada que quisieredes. Mas del Çid non uos digo agora mas. Si non quel fago esta gracia. a el. Et a uos. que todos los de mio regno que fueren omnes de armas. Et a Mio Çid quisieren yr ayudar que los suelto que uayan. Et quito les los cuerpos. Et los aueres et las heredades. Estonces Aluar Hannez beso le las manos. Et dixo assi. Sennor. de uos Dios uida por muchos annos et buenos. Et muchas gracias sennor; por lo que uos dezides. Ca pues que esta merced nos agora fazedes. si Dios quisiere mas et meior nos la faredes adelante. Et con la merced de Dios nos guisaremos como nos lo fagades. Agora diremos de las otras cosas que contecieron estonces. Ell anno en que esto fue murio Habeth Almucamiz rey de Seuilla. Et regno empos ell su fijo Aben habez en Seuilla. Et en Cordoua .xx. annos. Este Abenhabeth fue sennor de toda ell Andaluzia. Et mantouo bien toda su tierra. fasta el tiempo que los Almorauides de Lutinia passaron aquend mar. Et quel tomaron la tierra. yl tollieron el sennorio. Agora dexa aqui la estoria de fablar de Aluar Hannez et de las otras cosas; et torna a contar del Çid.

Capitulo 859. De como fizo el Çid estando en aquel poyo de sobre Mont Real.

Andados .v. annos del regnado del rey don Alffonso. Et fue esto. En la era de mill. Et .c. Et .v. annos. Et andaua otrossi estonces el anno de la Encarnacion del sennor en mill. Et .Lxvij. Et el de Henrric Emperador de Roma en .xvij. Mantouo el Çid aquel poyo. et fizo y su posada .xv. sedmanas [171r] pues que a Mynnaya enuio a Castiella segund cuenta la estoria. Et dalli adelant por razon del Çid llamaron siempre aaquel logar et llaman aun oy dia el poyo de Mio Çid. Et daquel logar fizo el Çid muchas buenas caualgadas de grandes ganancias. Et apremio muchas tierras. Et gano Ribera de Rio Martin. que es buena tierra. et mantouola por suya. Et estas nueuas daquellos grandes fechos del Çid llegaron a Saragoça. Et peso ende mucho a los moros et a los sus reys. Mas el Çid quando uio que Aluar Hannez tanto tardaua fizo le mucho de estar alli tanto tiempo et de non salir. Et dexo el Poyo desamparado et fizo una trasnochada. Et passo en ella Theruel. Et fue posar al pinar de Touar. Et corrio a Saragoça. Et fizo les tanto de mal fasta quel ouieron de pechar et darle parias. Despues daquello a cabo de pocos dias puso el Çid su amor muy grand con Almundafar rey de Saragoça. Et el rey recibiol muy onrrada mientre en la villa. Et fizol y mucha onrra. Despues desto otrossi a cabo de tres sedmanas llego de Castiella Aluar Hannez mynnaya. con .cc. caualleros de linnage. Et de escuderos a pie et de otros peones tan grandes compannas. que pora acometer grandes et nobles fechos eran grand complimiento. El Çid quando sopo que uinie Mynnaya saliol a recebir. Et Minnaya començol luego a contar todas las nueuas de comol fuera con el rey don Alffonso et delo quel dixiera. El Çid quando oyo de parte del rey aquellas nueuas tan buenas plogol mucho con ellas et sonrrixosse con el grand plazer que ende ouo. Et gradesciolo mucho a Mynnaya. por que fuera tan buen mandadero. Et tan bien cumpliera su mandaderia. Et sobre todo gradesciolo mucho a nuestro sennor Dios. Et alço las manos. Et loo le mucho las mercedes quel fazie tantas et tan grandes. Agora diremos aun de los fechos deste Çid Roy Diaz.

Capitulo 860. De como el Çid corrio tierras de Alcanniz et lidio con el conde Remont Berenguel et comol priso.

Andados .vi. annos del regnado deste rey don Alffonso. Et fue esto. En la Era de mill. Et cient. Et vi. annos. Et andaua otrossi estonces ell anno de la Encarnation en mill. Et Lx. viij. Et el de Henrric Emperador de Roma en .xx. Pues dicho auemos de como Almundaffar rey de Saragoça recibiera el Çid en la Villa muy onrrada mientre. En este anno estando el Çid en Saragoça muy alegre; adolecio el rey Almundaffar. Et cumplio alli sus dias et murio. Et dexo .ij. fijos. Et all uno dixieron Çuleyma. Et all otro [171v] Abenalhage. Et partieron el regno entressi. Et Çuleyma ouo el Regno de Saragoça. Et Abenalhage el de Denya. Et Çulema rey de Saragoça amo mucho a Roy Diaz. et diol todo su regno en poder et en guarda. Et mando a sus uassallos que fiziessen todo lo que el mandasse. Et despues daquello començosse grand desamor et enemiztat entre Çuleyma et Abenalhage. Et guerrearonsse ell uno all otro. Et el rey don Pedro de Aragon et el conde Remon Berenguiell de Barçilona ayudauan a Abenalhage. Et auien muy grand querella de Roy Diaz Çid por que se tenie con Çuleyma por quel guardaua la tierra. Et tod esto tomo el Çid de sus compannas dozientos caualleros escollechos a mano. Et trasnocho con ellos. Et fue correr tierras de Alcammiz. Et duro en esta caualgada .iij. dias. Et aduxo dend muy grand prea. Et sono esta caualgada mucho por tierra de moros. Et peso ende a los de Monçon. Et a los de Huesca. Mas plazie a los de Saragoça. por que pechauan al Çid et estauan del seguros. El Çid pues que se torno a Saragoça partio por todos los suyos su caualgada que trexo muy grand como auemos dicho. Et dio ende sus derechos complidamientre a cada unos. Despues que esto ouo alli librado el Çid dixo alli a sus compannas. Amigos bien sabedes uos. que todos los que por armas an de guarir como nos. que si en un lugar quisieren siempre morar; que non puede ser que non menoscaben y mucho. Et por ende guisat uos todos pora cras mannana. Et saldremos daqui. Et yremos uuscar otras posadas. Otro dia mannana mouieron dalli assi como dixo el Çid. Et fueron et assentaronse en un lugar que dizen el puerto de Alocaz. Et dalli corrio el Çid Huesca. Et Montaluan. Et duro .x. dias en aquella caualgada. Et sono esto por muchas Villas de muchas tierras de moros. Como el que era echado de Castiella les fazie mucho mal. Et llego el mandado desto a don Remon berenguiel conde de Barçilona. Et a Abenalhage rey de Denia. como el Çid corrie toda la tierra. El Conde quando lo oyo pesol muy de coraçon. Et touo lo por su desonrra. por que tenie ell aquellas tierras de los moros en comienda. Et dixo alli el conde sus palabras grandes en esta guisa. Grandes tuertos me tiene el Çid de Viuar. firio me mio sobrino dentro en mi corte. Et nunqua despues me lo emendo. Agora corre me las tierras que yo tenie en guarda. Et yo nunqual por esto desafie. nin le torne amiztat. Mas quando melo el uusca tantas uezes. yo non puedo estar que ge lo non demande. Dichas estas razones ayuntaron grandes poderes el conde et Abenalhange de moros et de xristianos. Et fueron empos el Çid .iij. dias et tres noches quanto mas pudieron. Et alcançaron [172r] le en el pinar de Touar. Et assi uinien esforçados que a manos se le cuedaron tomar. El Çid aduzie estonces muy grand prea. et descendie de una sierra. Et llegaua yuso a un vall. Et llegol alli el mandado como el conde don Remon et Abenalhage uinien empos el por toller le lo que leuaua. Et matar a el o prenderle. El Çid quando aquello oyo enuio luego dezir al conde que aquello que el fazie que lo non touiesse el por mal. ca non leuaua nada de lo suyo. Et quel dexasse yr en paz. El conde otrossi enuiol dezir que aquello non serie. Mas que lo quel fiziera antes et aquello quel fazie estonces que gelo pecharie todo. Et sabrie a quien fazie desonrra. El mandadero tornosse a priessa con este mandado al Çid et dixol assi como el conde lo dixiera. El Çid quando uio que menos de Lid non se podrie librar; dixo a sus caualleros. fazet a parte la presa que traemos. Et armad uos quanto mas ayna pudieredes. Ca uienen alli el conde don Remond et el rey Abenalhage con grandes yentes de xristianos et de moros. Et semeia me que nos querran toller lo que leuamos. Et aun fazer nos peor si pudieren. Et menos de batalla non se querran partir de nos. Et si daqui nos ymos empos yran fasta que nos alcancen. Et pues que de su contienda non nos podemos partir; meior sera que lo ayamos con ellos aqui. Et bien fio en la mercet de Dios. que cient caualleros de nos deuen uencer a ellos todos. Et ante que ellos llieguen al llano firamos en ellos. Et por algunos que derribemos dellos desmayaran los otros et foyran. Et desta guisa uera Remont berenguel tras quien uiene en alcanço al pinar de Touar pora toller me lo que yo auia ganado de los enemigos de Dios et de nuestra ley. el Çid diziendo esto uieron uenir la cuesta ayuso los poderes de los francos. Et el Çid quando los uio mando a los suyos que los fuessen ferir derraniada mientre. Et esto fizieron ellos todos muy de grado. empleando muy bien las lanças et las otras armas. derribando a los unos et firiendo a los otros. Et uencio el Çid la batalla. Et priso y al conde. Et gano y dessa uez la espada que dixieron Colada. et leuo al conde preso pora su tienda. Et mandol guardar muy bien. Et partio luego con todos los suyos la ganancia que auie fecha. Aun ua la estoria por la cuenta de los fechos del Çid. Et dize adelant assi.

Capitulo 861. De como solto el Çid al conde Remont Berenguel de la prision et lo enuio pora su tierra.

Esto librado alli desta gujsa que dicho es; mando luego el Çid fazer muy grand cozina. Et adobar maniares [172v] de muchas guisas por fazer plazer al conde don Remond. Mas el conde non lo precio nada. njn quiso comer ninguna cosa. maguer que gelo aduzien delante. ante sossannaua a los que ge lo trayen. Et quandol aquexaron mucho que comiesse dixo. que por quanto auie en Espanna que non combrie ende bocado. et que antes perderie el cuerpo. et ell alma que lo fazer. El Çid quando gelo dixieron fue a el. Et como era omne mesurado dixol assi. conde. comet. et beuet. ca esto en que uos sodes por uarones passa. Et non uos dexedes morir por ello. Ca aun podredes cobrar uuestra fazienda et enderençar esto. Et si fizieredes como yo digo; fare yo como salgades de la prision. Et si non fizieredes como yo digo; en toda uuestra uida non saldredes de la prision. nin tornaredes a uuestra tierra. Respondiol aquella ora el Conde et dixol. Don Rodrigo. comet uos que sodes omne de buena uentura et lo merescedes. Et folgat en paz. Et en salut. Ca yo non combre nin fare al si non dexar me morir. Tres dias contendieron con el conde. tan bien el Çid como los suyos que comiesse. Mas non pudieron con el. Et el Çid quando esto uio. con el grand duelo que ouo dell dixol. Conde bien uos digo uerdad que si non comedes si quier algun poco que nunqua tornaredes a uuestra tierra. Et si comieredes por que podades ueuir; fazer uos e yo tanto. Daruos e dos caualleros destos uuestros que aqui tengo presos. Et que uos aguarden. Et quitar uos e los cuerpos a uos et a ellos. Et soltar uos e. Et dar uos e de mano que uos uayades. Quando esto oyo el Cuende fuesse alegrando et dixo. Roy Diaz. esto que auedes dicho si lo cumplieredes; en quanto yo uiua me maraujllare dello. Dixol essa ora el Çid. Pues comet agora que lo uea yo. Et luego uos enuiare. Pero tanto uos digo. que de quanto auedes aqui perdudo que uos non dare ende nada. Ca non es fuero nin costumbre; si non si lo quiere fazer por su mesura aquel que lo gana. De mas elo yo mester pora estos que lo an lazrado comigo. Et tomando de uos et de los otros; yremos nos guaresciendo. Ca esta uida auremos nos a fazer fasta que Dios quiera. assi como omnes que an yra de su sennor et andan echados de su tierra. El conde ouo plazer daquello que el Çid dizie. quel non darie nada delo que tomara. Essa ora demando el conde agua pora las manos. Et lauosse. Et comio el. Et aquellos dos caualleros que el Çid daua quel aguardassen. Et pues que ouieron yantado; dixo el conde a Roy Diaz. Çid mandad nos dar las bestias si uos plogujere. Et yr nos emos. El Çid dio [173r] les estonces muy bien de uestir. et espenssa fasta su tierra quanto les cumpliesse. Et enuio los. Et fue con ellos fasta la primera posada. Et en espidiendosse unos dotros; razonosse el Çid contral conde desta guisa. Ydes uos conde a guisa de muy franco. Et gradesco uos yo mucho quanto me dexades. Pero si despues uos uiniere a uoluntad que uos querades de mi uengar; fazet me lo saber antes. Et o me dexaredes de lo uuestro; o leuaredes algo delo mio. Respondiol el Conde. Çid. uos en uuestro saluo estades agora. Et yo pagado uos e. por tod este anno. Et non tengo en corac'on de uos uenir uuscar tan ayna. Desi fuesse el conde. Et tornosse el Çid a sus compannas. Et ouo su alegria grand con ellos de sus buenos fechos. que Dios les daua a fazer et a complir. Et empos esto tornosse el Çid pora Saragoça. Agora diremos de otra contienda que nascio luego al Çid.

Capitulo 862. De como el Çid desbarato los .C. Et .L. caualleros del rey don Pedro de Aragon et gano tierras de Burriana.

Andados .vii. annos del regnado deste rey don Alffonso et fue esto. En la Era de mill. Et cient. Et .vij. annos. Et andaua otrossi estonces ell anno dela Encarnation del sennor en .mill. Et .Lxix. Et el de Henrric Emperador de Roma en .xxi. En aquella sazon que dezimos estando el Çid en Saragoça guiso su hueste muy grand pora yr sobre Monçon. Et correr tierra de Xerita. Et Onda. Et Almenar. Et quando el rey don Pedro de Aragon sopo esto pesol mucho. Et dixo que lo non osarie fazer Roy Diaz aquello. Et llego luego muy grand hueste et fue contra el. El Çid salio de Saragoça et andido quanto una iornada. Et ueno ala Villa que dizien Piedra alta. Et finco y sus tiendas a oio de sus enemigos. Otro dia entro en el Castiello de Monçon. ueyendolo el rey don Pedro sobre pleytesia que ouo con los moros del Castiello. Mas pero que el rey don Pedro lo uio non oso yr a ell. Despues desto salio de Monçon el Çid. Et fuesse pora Tamariç. Et moro y unos pocos de dias. Et un dia salio de la Villa el con .x. caualleros. Et fallosse con caualleros del rey don Pedro. que eran fasta .c. La. Et desbarato los todos. Et priso dellos los .vij. caualleros con sus caualos. Et los otros fuxieron. Et cuenta aqui la estoria que despues rogaron essos caualleros a Roy Diaz que los soltasse. Et el fizolo. Et sobresso dioles sus cauallos. Despues desto salio dalli el Çid. Et fue descendiendo contral mar de medio dela tierra. pora fazer dalli sus caualgadas [173v] et guerrear la tierra. Et gano dessa yda a Onda. Et todas las otras tierras que dizen de Burriana. Et tanto eran grandes las sus conquistas et fechas ayna que llegaron las sus nueuas a Valencia. Et sono por la Villa. Et por todos los pueblos de sus terminos los buenos fechos que el Campeador fazie. Et fueron ende espantados et temieronse ende. El Çid tornosse estonces a Tamaric. o era Çuleyma rey de Saragoça. Aun cuenta la estoria. que acaescio a Roy Diaz Çid empos esta.

Capitulo 863. De como lidio el Çid con Abenalhage et con el conde de Barçilona et con otros condes, et los uencio.

Andados .viij. annos del regnado del rey don Alffonso. Et fue esto. En la Era de mill. Et cient. Et .viij. annos. Et andaua otrossi estonces ell anno dela Encarnation en .mill. Et Lxx. Et el de Henrric Emperador de Roma en .xxij. En este anno que dezimos. Albenalhange rey de xenia ouo su conseio con el conde don Remond berengujel de Barçilona. Et con el conde de Cardona. Et con ell hermano del conde de Vrgel. Et con los poderosos de Belsaldon. Et con los de Rosillon. Et de Carcasses. De como cercassen el Castiello de Almenar que auie renouado el Çid por mandado del rey de Saragoça. Et fizieron lo assi. Et combatieron el Castiello muchos dias. fasta que minguo ell agua a los que eran dentro. En tod esto era ydo Roy Diaz el Çid al Castiello de Escarp. que es entrel Rio de Cinga et Segre. que prisiera el con sus compannas. Et ell estando y enuiol mandado el rey de Saragoça que acorriesse al Castiello de Almenar. ca cercado gelo tenien. Et el Çid luego que aquello oyo uenosse pora Tamaric do era esse rey de Saragoça. Et el rey quando llego el Çid; dixol que lidiasse con aquellas huestes quel tenien cercado el Castiello. Respondiol el Çid. Mucho serie meior que diesses algun auer a tu hermano et que descercasse el Castiello. ca non podriemos lidiar con ellos. por que tantos son como ell arena dela mar que es sin cuenta. Et dixol el rey. sea como tu quisieres. El Çid enuio estonces dezir a Abenahage. Et a todos los otros altos omnes que eran en la cerca de Almenar. que tomassen auer que les querien dar. Et que descercassen el Castiello et que se fuessen ende. Et ellos non lo quisieron fazer. Estonces el Çid quando uio que se non querien partir del Castiello por ninguna guisa; mando armar a todos los suyos. Et paro sus azes. Et fue ferir en las huestes de Abenalhage. Et uenciolos a todos. Et [174r] segudo los muy aluen. Et mato muchos dellos. De guisa que pocos escaparon ende. Et fueron y presos muchos caualleros. Et aduxo los el Çid a Thamaric. Et metio los en mano del rey Çulema. Et el touolos presos .viij. dias. Mas en cabo rogo el Çid por ellos. Et el rey soltolos. Et ellos fueron se luego pora su tierra. Estonces empos esto tornosse el Çid a Saragoça. Et los moradores de la Çibdad recibieron le muy bien con grand aluoroço. Et el rey de Saragoça onrro mucho al Çid. Et diol poder en todo su regno. Agora dexa aqui la estoria las otras razones et torna a fablar deste rey don Alffonso el seteno.

Capitulo 864. De como el rey don Alffonso fue sobrel castiello de Rueda et mataron y all jnffant don Ramiro et al conde don Gonçalo.

A pocos dias despues destas razones que dichas auemos. alçauasse el Castiello de Rueda que es cerca Saragoça. Et alçosse con ell un Andaluz que auie nombre Abolffalac. Et esto fizo el por Adoffir tio de Almundaffar que tenie preso en aquel Castiello un su hermano. Et Adoffir enuio sobresto su mandado muy en poridad al rey don Alffonsso de Castiella quel uiniesse ayudar. Et el rey don Alffonsso enuiol y al conde don Gonçalo. Et all inffant don Ramiro con grand poder quel acorriessen. Et ellos ouieron so conseio con Adoffir. Et conseiaron le que enuiasse por el rey don Alffonso. Et rogarle. que el uiniesse y por su cuerpo. mismo. Et el rey don Alffonso fizo lo. Et fue alla. Et entre tanto murio aquel Adoffir. Et Aluafalac el que se alçara en aquel Castiello conseiosse con aquel inffant don Ramiro. Et dixol que darie el Castiello al rey don Alffonso. Et esse Aluaffalac salio al rey don Alffonsso como a recebirle. Et fablo con ell en arte como en Razon de paz. Et conuidol que entrasse en el Castiello. Mas el rey non lo quiso fazer. Et mando entrar alla a sus Ricos omnes. Et el finco fuera. Et pues que ellos fueron dentro; mintio les Aluaffalac de quanto pusiera con el rey. Et' los moros que estauan en las torres començaron de darles a piedras. Et a apedrearlos. Et mataron y muchos dellos. Et murio y ell inffant don Ramiro. Et el conde don Gonçalo. Quando esto uio el rey don Alffonso ouo ende muy grand pesar. Et tornose a la posada muy yrado. Et muy sannudo. Roy Diaz Çid el Campeador quando oyo lo que contesciera al rey don Alffonso en aquel Castiello; fuesse pora el con grand caualleria. Et el rey quandol uio; fue muy alegre. Et plogol mucho con el. Et recibiol muy bien. Et perdonol. Et mandol que se uiniesse con el pora Castiella. [174v] Mas el Çid non pudo estonces uenir con el. Et el rey don Alffonsso tornosse pora Castiella.

Capitulo 865. De como Roy Diaz el Çid preso al rey don Pedro de Aragon et a otros muchos altos omnes con el, et tornosse el Çid pora Castiella al rey don Alffonso.

Andados .nueue annos del regnado del rey don Alffonsso. Et fue esto. En la Era de mill. Et cient. Et . ix. annos. Et andaua otrossi estonces ell anno dela Encarnacion del sennor en .mill. Et .Lxxi. Et el de Henrric Emperador de Roma en .xxij. Este anno que dezimos sacaron el Çid et el rey de Saragoça muy grand hueste. et entraron por tierras de Aragon. Et robaron et catiuaron muchos. Et duraron alla .v. dias. Et desi tornaron se poral Castiello de Monçon con grand ganancia. Despues aun saco Roy Diaz su hueste otra uez. Et fue correr tierra de Abenalhage. Et fizo en ella grand danno. Et entro ala montanna de Muriella. Et fizo y grand danno otrossi en los que morauan dentro en essa montanna et en Muriella. Et ell andando faziendo esto; enuiol rogar el rey de Saragoça quel labrasse sobre Muriella un Castiello que yazie derribado. Et el Çid fizolo. Abenalhage quando sopo que el Çid alli labraua pesol mucho. Et enuio dezir al rey don Pedro de Aragon que se ayudassen amos contral Çid. El rey don Pedro de Aragon pues que sopo como Roy Diaz Çid le entrara assi por la tierra; llego grand hueste. Et entrell et abenalhage fueron contra el con muy grandes poderes. Et la primera noche albergaron en la Ribera de Ebro. El rey don Pedro enuio estonces sus cartas al Çid que se partiesse daquell Castiello en que estaua labrando. Mas el Çid non lo quiso fazer. Et enuio dezir al rey don Pedro. que si quisiesse passar por aquel lugar en paz; quel seruirie de buen coraçon. Et non le farie ningun pesar. Et de mas si quisiesse quel darie cient caualleros en ayuda quel siruiessen. Et fuessen con ell do el mandasse. Quando uio el rey don Pedro que el Çid non se querie partir del Castiello fue muy yrado. Et paro luego sus azes. et el Çid las suyas. Et lidiaron. mas duro la batalla mucho. Pero al cabo uencio el Çid al rey don Pedro. et al rey Abenalhage que era y con ell. Et fue y preso el rey don Pedro. et muchos otros altos omnes con ell. Et essos altos omnes fueron estos. Ell Obispo don Remon de Dalmaz. El conde Sancho sanchez de Pamplona. El conde don Nunno de Portogal. Don Gustio gonçalez. Nunno suarez de Leon. Nunno sanchez de Gallizia. Caluet de Sobrarue. Yennego sanchez de Concluso. [175r] Xemen sanchez de buyl. Pepin aznarez. Et Garçi aznarez su hermano. Sancho perez de Pamplona. el nieto del conde don Sancho. fernand gonçalez de Aragon. Sancho garcia de Alcaçar. Blasco sanchez mayordomo del rey don Pedro. Et Garçi Diaz de Castiella. Et con estos mas de mill. omnes de prestar. Et Abenalhange fuxo si non y uiniera con estos otros omnes buenos. Mas soltolos despues el Çid. por duelo que ouo del rey don Pedro. Et dellos. Et por ruego quel fizieron otrossi. Mas ellos non se quisieron despues partir del Çid fasta que llegaron con el a Saragoça. Et el rey de Saragoça quando sopo que uinie el Çid saliol a recebir con sus fijos et con toda su yente. Et fizol muy grand onrra. Et duro estonces alli el Çid pocos dias. Desi gujsosse a si et a su companna apuesta mientre et uenosse pora Castiella al rey don Alffonso. quel auie ya perdonado assi como dixiemos. El rey don Alffonso otrossi recibiol muy bien et onrrol mucho. Et diol en tenencia el Castiello de Duennas con toda su Alffoz. Et Ordeion. Et Ybia. Et Ogunna. Et Biruiesca. Et Langa con todas sus Alfozes. Et aun sobre tod esto diol Carta robrada et soltura. que todos los Castiellos que el pudiesse conquerir en tierra de moros que los ouiesse por heredat pora ell et pora su fijo et a su nieto. Et a todo su linnage. aquellos que del uiniessen. Et que los heredassen por linna por su heredad propria. Et estido el Çid daquella uez con el rey don Alffonsso grand tiempo siruiendol et onrrandol mucho como a sennor natural. Et el cuemo buen uassallo et leal. Del dezeno anno fastal trezeno del regnado deste rey don Alffonsso non fallamos que contar que pora aqui pertenesca. Si non tanto. que en el .xij. anno que murio el rey don Pedro de Aragon. Et regno empos el su hermano don Alffonsso al que llamaron alla en su Aragones batallero. Et que esse anno otrossi murio Almemon rey de Toledo. Et alçaron rey empos ell a Yssem su fijo. Et que en el .xiij. anno; murio otrossi aquell Yssem rey de Toledo. Et fue alçado por rey en su lugar; Yahia su fijo. Et nieto de Almemon. Agora dexa aquj la estoria de fablar de las otras cosas. Et torna a contar de don Alffonsso rey de Castiella et de Leon.

Capitulo 866. De como el rey don Alffonso tollio los panes et las frutas a Toledo et poblo Estremadura.

Andados .xiij. annos del regnado deste rey don Alffonsso. Et fue esto. En la Era de mill. Et xiij. annos. Et andaua otrossi estonces el anno dela Encarnation del sennor en mill. Et Lxx. v. Et el de Henrric Emperador de Roma en .xxvij. [175v] Pues que Almemon rey de Toledo et su fijo Yssem fueron muertos como es dicho; regno empos ellos Yahya Alcadirbille. que era nieto de Almemon et fijo del rey Yssem fijo deste rey Almemon. Este rey Yahia fue mal rey et auol. Et muy alongado de las mannas et de las costumbres de su auuelo el rey Almemon. Et de su padre el rey Yssem. Et començo de ser muy esquiuo et muy brauo contra los meiores de sus moros. Et desi contra todo su pueblo. et fazieles muchos pesares et muchas fuerças. De guisa que todos cobdiciauan su muerte. por que ueyen que era omne malo. Et uil. et que non auie en el bien ninguno. Su auuelo el rey Almemon diera al rey don Alffonsso por tierra en el regno de Toledo Olmos. Et Canales. Et quando el rey don Alffonso yua con el rey Almemon en ayuda contra los moros que eran sus enemigos; dexaua el rey don Alffonsso alli en aquellos logares los omnes quel enfermauan et eran flacos. Pues los de Toledo seyendo maltrechos daquel su rey Yahia assi como dezimos. Et aun maltrechos de todos sus enemjgos de aderredor. Et non auiendo ende emienda ninguna por su sennor. Et esse su rey Yahia non auiendo crebanto nin duelo ninguno de los sus crebantos dellos; ayuntaronse todos en uno et uinieron a ell. Et dixieron le. rey Yahia. conuienete que defendas tu pueblo et tu tierra. Et que te trabages ende. Si non bien te dezimos que uuscaremos quien nos deffenda. Mas Yahia segund cuenta la estoria como era omne mucho de mugieres et de malas costumbres; non preciaua nada aquello que sus moros le dizien. nin meioraua ninguna cosa en si. Ellos estonces ueyendose maltrechos dell enuiaron por el rey de Badaioz que los ayudasse. Et metieron le consigo dentro en la Villa a pesar daquel su rey Yahia. Et' sobresso enuiaron luego otrossi sos mandaderos a este rey don Alffonso en grand poridad que los uiniesse a acorrer. ca eran en grand periglo. Et que cercasse la Villa. pues que passado era el plazo de la postura que ell ouiera con el rey Almemon su Auuelo. Et desi que quando ellos uiessen coytados de fambre et de lazeria a todos los de la Çibdad. que conseiarien ellos al pueblo seyendo en la quexa de la fambre que diessen la Çibdad a el. Et esto enuiauan dezir los mayorales al rey don Alffonsso en muy grand poridad. El rey don Alffonsso quando uio los mandaderos et oyo lo quel dixieron plogol mucho. Et fue ende muy alegre. Pero que ouo muy grand pesar por que el rey de Badaioz cogieran dentro en la Villa. Mas por tod esso non dexo el de fazer lo suyo. Et ayunto luego muy grand hueste de todas las partes de su [176r] regno et fuesse pora Toledo. Et assi como llego tollioles todos los panes. Et las uinnas et las otras frutas por todas las tierras a derredor. Et esto fizo a Toledo et a sus aderredores este rey don Alffonsso bien por quatro annos uno empos otro. Et maguer que Toledo era mas complida et mas abondada que todas las otras Villas sus uezinas non pudo seer que non ouiesse mingua de uiandas auiendo las assi tollidas cada anno. Entre tod esto poblo ell Estremadura. Et las Çibdades. Et las Villas que estauan despobladas. Et como yermas. Et las que poblo estonces este rey don Alffonso fueron estas. Salamanca. Auila. Medina del campo. Olmedo. Coca. Yscar. Cuellar. Segouia. Sepuluega. Despues desto tornosse el rey don Alffonsso pora Leon bien et onrrada mientre. Et sabet aquj todos 2los que esta estoria oyedes. que en todas estas cosas se acerto el Çid Roy Diaz con el rey don Alffonsso. Et fue muy bueno en todo. En este .xiijo. anno lidio el rey don Alffonso con Abenalhage en Consuegra. Et fue uençudo el rey don Alffonsso. Et metiosse en esse Castiello de Conssuegra. En aquella batalla murio Diag royz fijo de Roy Diaz mio Çid. Del .xiij. anno fastal .xvij. del regnado deste rey don Alffonsso non fallamos cosa que de contar sea que a la estoria pertenesca. Si non tanto que en el .xiiij. anno que lidio Abenalhage con Aluar Hannez Minnaya en Almodouar. Et segund dizen los ancianos que son muy antigos. que alcançaron mas las cosas daquel tiempo. Aluar Hannez tenie .d. caualleros. Et Abenalhage .xv. mill. Mas pero por la uertut de Dios que lo quiso fazer; uencio Aluar Hannez a Abenalhage. Et fue esta batalla en el Campo de Almodouar so Cordoua. Otros dizen otrossi dela otra parte que Abenalhage a Aluar Hannez. Et aun quel dio grand espadada por el rostro. Et en el .xv^o. anno se fue este rey don Alffonso sobre Coria, que era aun estonces de moros. Et presola. Aun ua la estoria en la cuenta de los fechos del rey don Alffonso sobre la conquista de Toledo. Et diz...